März 2014

Veröffentlicht am von — Keine Kommentare ↓

Lukas
Ich gahn i di 1. Klass zum Herr Sinniger. Nach eim Jahr Chinzgi in Tagelswange, eim Jahr Chinzgi in Lindau, darf ich jetzt uf Winterberg id Schuel. Ich bin en guete Schüeler und darf sogar is Lernforum. Det gfallts mer fascht am Beschte, det wird ich richtig gforderet. I minere Freizyt spiel ich Unihockey bi de Pumas. Im Moment fahr ich gern Velo mit Klassekamerade. Und denn spiel ich mega gern mit em Simon. Mir sind es Dreamteam und verstönd eus blendend. Mir teiled au s Zimmer mitenand. Dine tuen ich immer no gern Lego Technics baue. Ich erfinde di kompliziertischte Getriebe und Lenkige. De Schuelwäg dur de Holebach gfallt mir au bsunders. Und natürli bin ich immer no en hitzige und mues nur bi under 0° d Jagge zue tue. Suscht schwitz ich. Jede zweit Samschtig bin ich i de Jungschi, das gfallt mer. Min beschte Fründ Joschue chunnt au! Mis Lieblingsbuech isch „das Mamutbuch der Technik“, det lies ich amel, wie d Sache funktioniered und denn erklär ichs am Mami. Ich bin fröhlich, hilfsbereit und en gfreute Bueb.

Simon
Ich darf in Grafstal in erschte Chinzgi. Bis jetzt bin ich jede Tag gern gange und jede Tag fröhlich hei cho. S gfallt mer so guet bim Herr Schmid. Meischtens mues ich grad ufs WC wänn ich hei chume. Ich han vill verschiedeni Fründe. Am beschte us chum ich mit em Leandro, de Saskia, de Sara und mit em Finley. Und denn au no mit em Elia, aber de gsehn ich nur selte. I minere Freizyt gahn ich is Chinderturne. Das isch lässig. Das Jahr hämmer sogar e Uffüehrig gha! Dihei tuen ich gern zämesetzle, Unihockey spiele und Lego baue. Ich baue aber kei komplizierti Sache, mir gfalled Ragetene und Autos us Lego. Mit em Lukas und mit em Mami lieb ichs, Tschau Sepp z spiele. Min grosse Brüeder isch sowieso en coole, mir spieled mega vill mitenand. Natürli hämmer au no de Manuel, aber er isch halt i vilem nochli z chli. Ich bin flissig, lernbegierig und mache gern Chinderrätsel. Ich bin en heimlifeisse, fröhliche und usglichne Bueb. Au en mega Gfreute!

Manuel
Ich bin en Nuggibueb und en ahängliche bim Mami. Aber die grosse zwei speiled meischtens mitenand, so nimm ich ebe s Mami zum spiele. Ich lose gern d CD mit de Schlieremer Chind vom Zoo und luege gern Büechli mit Tier oder Fahrzüg a. Ich bin nonie ufs WC, defür chan ich mit mim Laufrad u schnell fräse. I minere Freizit (ich han ja eigentli nur Freizyt :-)) gahn ich mit em Mami is MuKiTurne. De Mukibär hät mir sogar e Charte gschribe us de Ferie. Leider häts det keis anders Chind us Grafstal wo ähnlich alt isch wie ich. Aber ich spiele mit de Zwilling vo näbeddra oder mit mine zwei Cousins Robin und Linus. Ich bin guet im Chlättere und Umegumpe und liebe min Hund. Ich han mängisch en Dickchopf, aber suscht bin ich glaub en Gmögige. Uf jede Fall bin ich de ruhigscht und de kuschligscht i de Familie. S Mami hät a mir au ganz vill Freud.